Кормандони ҶСП «Вавилон-Мобайл» дар мусобиқаи пауэрлифтинг натиҷаҳои баланд нишон доданд!
Ҳафтаи гузашта дар шаҳри Душанбе бахшида ба Рӯзи Президент мусобиқаи кушод оид ба пауэрлифтинг (сеҳарба) байни собиқадорон баргузор гардид. Мусобиқаи мазкур, ки бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон баргузор гардид иштирокчиёнро аз гӯшаву канори кишвар гирд овард.
Миёни варзишгароне, ки дар категорияи собиқадорон ширкат варзиданд, ширкати «Вавилон»-ро мудири бахши шӯъбаи бехатарии «Вавилон-Мобайл» Шамсиддин Мирзоев ва корманди шуъбаи назорати техникии «Вавилон-Т» Абдуллозода Каюмарс муаррифӣ карданд.
Шамсиддин Мирзоев дар вазни беш аз 105 кг баромад карда, бо натиҷаи умумии 515 кг. ҷойи дуюмро ишғол намуд. Абдуллозода Каюмарс, ки дар вазни то 93 кг рақобат намуд, натиҷаи ниҳоии 478 кг нишон дода, сазовори ҷои сеюм гардид.
Барои дастовардҳои шоён ҳар ду варзишгар бо диплому медалҳо мукофотонида шуданд. Ҷоизаҳоро ба онҳо раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода супурд.
